26 лістапада, Салігорск /Вольга Швайко - БЕЛТА/. У Беларусі будзе распрацавана праграма развіцця рэгіянальных электронных СМІ. Аб гэтым паведаміў сёння міністр інфармацыі Алег Праляскоўскі на выязным пасяджэнні калегіі Міністэрства інфармацыі, якое прайшло ў рэдакцыі Салігорскага тэлевізійнага канала, перадае карэспандэнт БЕЛТА. Па словах міністра, увага, якая ўдзялялася рэгіянальным электронным СМІ, будзе ўдзяляцца і ў наступным годзе. Ён адзначыў станоўчую тэндэнцыю - у рэспубліцы з'яўляецца ўсё больш добрых рэгіянальных тэлеканалаў, якія карыстаюцца вялікім аўтарытэтам у сваёй аўдыторыі, выпускаюць якасны праграмны прадукт. "Я думаю, што будзе мэтазгодным распрацаваць праграму развіцця электронных рэгіянальных СМІ, да прыкладу, на 2011-2013 гады", - сказаў Алег Праляскоўскі, дадаўшы, што ў міністэрстве чакаюць прапаноў па распрацоўцы дакумента ад прадстаўнікоў рэгіянальных СМІ. Як паведаміў начальнік упраўлення электронных сродкаў масавай інфармацыі Міністэрства інфармацыі Уладзімір Ядранцаў, у апошнія гады рэгіянальныя СМІ развіваліся дынамічна, важка заявілі аб сабе рэгіянальныя тэлеканалы. Па дадзеных на 1 лістапада, у Міністэрстве інфармацыі зарэгістравана 77 праграм тэлевяшчання, 55 з якіх - рэгіянальныя. Прычым 20 з іх - дзяржаўнай формы ўласнасці і 35 - недзяржаўнай. У параўнанні з мінулым годам колькасць праграм рэгіянальнага тэлевяшчання павялічылася на 6. Уласнае вяшчанне рэгіянальных тэлеканалаў складае ад 25% да 60% у іх агульным аб'ёме.