У Беларусі і Азербайджана ёсць вялікі патэнцыял для значнага прасоўвання ў супрацоўніцтве

7 чэрвеня, Баку /Кар. БЕЛТА/. У трэці дзень свайго знаходжання ў Баку Прэзідэнт Беларусі Аляксандр Лукашэнка сустрэўся з азербайджанскім прэм'ер-міністрам Артурам Расі-задэ, паведамілі БЕЛТА ў прэс-службе беларускага лідара. Падчас сустрэчы кіраўнік беларускай дзяржавы адзначыў, што на цяперашнім этапе гандлёва-эканамічныя адносіны паміж краінамі развіваюцца дастаткова дынамічна, аднак у дзяржаў ёсць вялікі патэнцыял для значнага прасоўвання наперад у гэтым напрамку. Беларусь будзе ўзмацняць сваю прысутнасць у Азербайджане, накіроўваючы сюды сваіх спецыялістаў, і працаваць па тых перспектыўных напрамках, якія ўжо пачынаюць тут рэалізоўвацца. У Азербайджане функцыянуюць зборачныя і сумесныя прадпрыемствы, працуюць беларускія спецыялісты ў будаўнічай галіне. На думку Прэзідэнта, Беларусь можа рэалізаваць у Азербайджане праекты на $1 млрд. Паводле яго слоў, гэта цалкам пад сілу двум краінам. Ён таксама лічыць, што азербайджанцам ёсць што прапанаваць еўрапейскаму рынку, і падкрэсліў, што Азербайджан можа разлічваць у гэтым плане на Беларусь як пляцоўку для гандлю з Еўропай. Кіраўнік беларускай дзяржавы адзначыў вялікі ўклад у дынамічнае развіццё гандлёва-эканамічных адносін міжурадавай беларуска-азербайджанскай камісіі. На яго думку, добра працуе ў Азербайджане і беларускае пасольства. "Уся палітыка павінна быць нацэлена на забеспячэнне эканамічнай стабільнасці ў адносінах, у гандлёва-эканамічным узаемадзеянні", - лічыць Аляксандр Лукашэнка. Ён дадаў, што адным з галоўных паказчыкаў працы пасольства з'яўляецца ўзровень узаемнага гандлю і інвестыцый. У гэты ж дзень кіраўнік беларускай дзяржавы наведаў Бакінскі славянскі ўніверсітэт. Тут Аляксандру Лукашэнку было прысвоена званне Ганаровага доктара гэтага ВНУ за заслугі ва ўмацаванні дружбы і супрацоўніцтва паміж Беларуссю і Азербайджанам, асабісты ўклад у развіццё сувязяў паміж народамі дзвюх краін. Выступаючы перад прафесарска-выкладчыцкім складам і студэнтамі Бакінскага славянскага ўніверсітэта, Аляксандр Лукашэнка адзначыў, што расцэньвае прысваенне гэтага звання як знак увагі і павагі да Беларусі, вялікі гонар для сябе асабіста і адначасова як стымул для далейшай працы па нарошчванні ўзаемавыгаднага партнёрства паміж дзвюма краінамі. Прэзідэнт падрабязна расказаў аб этапах станаўлення беларускай дзяржавы пасля распаду Савецкага Саюза, асноўных рысах беларускай мадэлі развіцця.

Кіраўнік дзяржавы спыніўся на ключавых аспектах беларускай знешняй палітыкі, адзначыўшы, што яе адметнымі рысамі з'яўляюцца прагматызм і паслядоўнасць у адстойванні сваіх нацыянальных інтарэсаў. Беларусь выразна прытрымліваецца стратэгіі шматвектарнасці, якую праводзіць ужо 15 гадоў. Краіна не мае глабальных геапалітычных амбіцый, яна не стварае канфрантацыі з суседнімі дзяржавамі. Аляксандр Лукашэнка падкрэсліў, што Беларусь гатова да дыялогу і канструктыўнага супрацоўніцтва з усімі замежнымі партнёрамі без выключэння ў самых розных сферах, але толькі на аснове ўзаемнай павагі, без спроб ціску і прымусу. "Мы катэгарычна супраць, каб нехта кагосьці нахіляў, штурхаў у спіну, - сказаў беларускі лідар. - Мы гатовы супрацоўнічаць, але на роўных". Што ж тычыцца ўзаемадзеяння з Азербайджанам, то Аляксандр Лукашэнка заявіў, што ў дзвюх краін "бліскучыя адносіны, і мы будзем іх падтрымліваць". "Сёння адлегласць - не перашкода для супрацоўніцтва. І вы павінны памятаць, што ў вас ёсць надзейныя сябры ў Беларусі", - сказаў Прэзідэнт. Кіраўнік дзяржавы закрануў таксама праблему ўрэгулявання нагорна-карабахскага канфлікту. На думку беларускага лідара, яна павінна быць вырашана выключна мірнымі сродкамі. Ён падкрэсліў: "Ніякія пасрэднікі не вырашаць вам гэту праблему. Толькі прамы дыялог кіраўнікоў Азербайджана і Арменіі". Затым Аляксандр Лукашэнка прыняў удзел у цырымоніі адкрыцця Цэнтра беларускай мовы і культуры ў Бакінскім славянскім універсітэце. Прэзідэнт адзначыў: падзея сведчыць аб тым, што Беларусь і Азербайджан і надалей "гатовыя вершыць вялікія справы і ісці ў адным напрамку". "Гэта яшчэ адна нітка народнай дыпламатыі", - падкрэсліў ён. Дасягнута таксама дамоўленасць аб адкрыцці азербайджанскага цэнтра ў Беларускім дзяржаўным педагагічным універсітэце імя Максіма Танка. Бакінскі славянскі ўніверсітэт падтрымлівае цесныя сувязі з БДПУ, а з новага навучальнага года гэтыя два ВНУ абмяняюцца выкладчыкамі беларускай і азербайджанскай моў. Аляксандр Лукашэнка пагутарыў таксама з актывам таварыства дружбы і супрацоўніцтва "Азербайджан - Беларусь", пакінуў запіс у Кнізе ганаровых гасцей.Пасля завяршэння мерапрыемстваў ва ўніверсітэце кіраўнік беларускай дзяржавы наведаў месца будаўніцтва будынка Пасольства Беларусі ў Азербайджане. Тут яго сустрэў Прэзідэнт Азербайджана Ільхам Аліеў. Кіраўнікі дзяржаў здзейснілі сімвалічную закладку капсулы ў фундамент будучага будынка. Аляксандр Лукашэнка лічыць, што будаўнікам пад сілу ўзвесці будынак пасольства за адзін год. Міністр архітэктуры і будаўніцтва Беларусі Аляксандр Селязнёў зрабіў кароткую прэзентацыю праекта будаўніцтва пасольства і праекта канцэпцыі развіцця прыморскай часткі Баку. Беларускія спецыялісты спраектавалі комплексную забудову набярэжнай зоны працягласцю 25 км. Плануецца, што частка плошчы будзе адведзена пад спартыўныя аб'екты: штаб-кватэру Алімпійскага камітэта, Палац водных відаў спорту, велатрэк, вяслярны канал, яхт-клуб. У паўднёвай частцы горада прапануецца стварыць музеі мора і нафты, а таксама працягнуць канатную дарогу. У праекце адведзена значная тэрыторыя пад парк адпачынку, дзе будуць прадстаўлены культуры розных народаў. Плануецца таксама стварыць на бліжэйшых астравах турыстычныя комплексы і гасцініцы. Ільхам Аліеў даручыў мэрыі Баку ўважліва разгледзець прадстаўлены беларускімі спецыялістамі праект. Для кіраўнікоў дзяржаў адбылася таксама кароткая прэзентацыя камунальнай тэхнікі сумеснай вытворчасці Мінскага аўтамабільнага завода і Гянджынскага аўтазавода. Затым яны працягнулі перамовы ў нефармальнай абстаноўцы ў рэзідэнцыі Прэзідэнта Азербайджана.-0-

БЕЛТА