27 мая, Мінск /Таццяна Пастушэнка - БЕЛТА/. Тэма 65-годдзя Перамогі савецкага народа ў Вялікай Айчыннай вайне стане лейтматывам VIII Рэспубліканскага фестывалю нацыянальных культур, які пройдзе ў Гродне 4-6 чэрвеня. Пра гэта паведаміў сёння на прэс-канферэнцыі намеснік міністра культуры Беларусі Тадэуш Стружэцкі, перадае карэспандэнт БЕЛТА. "Кожны фестываль нацыянальных культур, захоўваючы асноўныя традыцыі правядзення, набывае нейкія асаблівасці. Асаблівасць сёлетняга фестывалю заключаецца ў тым, што большасць яго мерапрыемстваў будзе прысвечана 65-годдзю Вялікай Перамогі. Тэма вайны і Перамогі будзе прасочвацца практычна ва ўсім", - адзначыў Тадэуш Стружэцкі. Яшчэ адной асаблівасцю сёлетняга свята стане тое, што на фестывалі будуць працаваць 40 нацыянальных падворкаў, у той час як на мінулым фестывалі іх было 27. Значна пашырылася і праграма: пройдзе больш за 70 мерапрыемстваў, частка з іх - упершыню. Акрамя таго, плануецца ўдзел міжнародных і замежных дэлегацый, прадстаўнікоў пасольстваў розных краін у Беларусі, а таксама гарадоў-пабрацімаў Гродна. Падчас правядзення фестывалю запланавана разгледзець прапанову аб яго ўступленні ў Міжнародную арганізацыю фестываляў, каб прыцягнуць яшчэ больш увагі Еўропы і ўсяго свету да гэтай унікальнай культурнай падзеі, прэзентаваць яе за мяжой. Ідэя правядзення фестывалю нацыянальных культур можа быць выкарыстана і іншымі краінамі. "Фестываль унікальны не толькі ў Беларусі, але і ва ўсёй Еўропе. Мерапрыемствы такога фармату ў іншых краінах пакуль не праводзяцца", - сказаў намеснік міністра культуры. Тадэуш Стружэцкі нагадаў, што адкрыццё VIII Рэспубліканскага фестывалю нацыянальных культур адбылося ў маі мінулага года ў Белдзяржфілармоніі. Абласныя гарадскія фестывалі, якія можна назваць адборачнымі турамі, прайшлі з кастрычніка па снежань 2009 года. З канцэртнымі праграмамі за гэты час выступілі больш за 2,5 тыс. чалавек, на заключныя мерапрыемствы ў Гродна рэспубліканскае журы запрасіла 792 прадстаўнікі розных нацыянальнасцей, сярод якіх 74 калектывы і 122 асобныя выканаўцы. Падчас правядзення адборачных тураў праграмы падрыхтавалі прадстаўнікі нацыянальнасцей, якія раней не ўдзельнічалі ў фестывалі, - таджыкі, туркмены, туркі. І калі ў I Рэспубліканскім фестывалі нацыянальных культур удзельнічалі прадстаўнікі 11 нацыянальнасцей, то ў гэтым годзе іх колькасць узрасла да 33.