20 мая, Мінск /Таццяна Паляжай - БЕЛТА/. Прэзідэнт Беларусі Аляксандр Лукашэнка прапануе літоўскаму бізнесу рэалізацыю перспектыўных праектаў, якія звяжуць дзве дзяржавы ў адзінае цэлае ў эканамічным плане. Аб гэтым заявіў сёння кіраўнік беларускай дзяржавы на сустрэчы з прадстаўнікамі дзелавых колаў Літоўскай Рэспублікі, перадае карэспандэнт БЕЛТА. "Мы, вядома, будзем вам гаварыць, што ў нас вельмі спрыяльны клімат для інвестыцый, будзем вас агітаваць, але не гэта галоўнае. Галоўнае ў тым, што ў нас ёсць вельмі перспектыўныя праекты, якія звяжуць нашы дзяржавы ў адзінае цэлае ў эканамічным плане", - адзначыў кіраўнік дзяржавы. "Я не стану хаваць, што мы без вас не можам абысціся ў плане транзіту на Балтыку і іншыя дзяржавы", - сказаў беларускі лідар. Аляксандр Лукашэнка адзначыў, што Беларусь у апошні час праводзіць курс на дыверсіфікацыю знешнеэканамічнай дзейнасці, а таму Літва, таксама як і Латвія, і Украіна, з'яўляецца вельмі важным партнёрам. "Мы ў апошні час спрабуем дыверсіфікаваць, і не без поспеху, знешнеэканамічную дзейнасць. Мы гэтага не хаваем (што часам выклікае незразумела чаму раздражванне ў нашых сяброў), што спрабуем адысці ад залежнасці ад адной дзяржавы па продажах, закупках і гэтак далей. Тым больш што часам гэта дзяржава, вам гэта добра знаёма, дзейнічае з пазіцыі сілы, як гэта было не аднойчы, - сказаў Прэзідэнт. - Таму мы не можам дазволіць сабе сядзець і чакаць манны нябеснай, нейкага прыхільнага стаўлення з боку адной ці дзвюх дзяржаў. Мы пачынаем шукаць і іншыя шляхі супрацоўніцтва". Кіраўнік дзяржавы адзначыў, што беларускі бок можа прапанаваць Літве "праекты, ад якіх практычна нікуды не дзенешся, таму што калі ад іх адмовіцца - сабе на шкоду".