Да канца 2016 года 3G-сувяззю плануецца пакрыць 97% тэрыторыі Беларусі, паведаміў начальнік сектара радыёчастотнага спектра і арбітальна-частатнага рэсурсу Мінсувязі Дзмітрый Корзун падчас круглага стала "Рэгуляванне галіны электрасувязі", які прайшоў падчас выстаўкі "ЦІБО-2016", перадае карэспандэнт БЕЛТА.
"Нашы аператары velcom і МТС ужо запусцілі тэхналогію UMTS-900. Да канца гэтага года, як яны дэкларуюць, на 97% тэрыторыі Беларусі будзе аказвацца паслуга 3G. Цяпер яна ахоплівае 53-54% тэрыторыі", - адзначыў Дзмітрый Корзун.
Начальнік сектара падкрэсліў, што аператар life:) пакуль у Дзяржаўную камісію па радыёчастотах не звяртаўся. "Яны таксама могуць хоць заўтра атрымаць дазвол на выкарыстанне стандарту UMTS-900, але мы працуем па заяўным прынцыпе", - растлумачыў ён.
Тэхналогія UMTS-900 валодае некалькімі сур'ёзнымі перавагамі ў параўнанні з больш традыцыйным для беларускіх сетак 3G стандартам UMTS-2100. Базавыя станцыі, якія працуюць у дыяпазоне 900 МГц, больш эфектыўна пакрываюць вялікія прасторы. Паводле даных даследаванняў і рэалізаваных праектаў у іншых краінах, тэрыторыя пакрыцця, якую забяспечвае базавая станцыя UMTS-900, у тры разы большая за тэрыторыю, якую пакрывае базавая станцыя стандарту UMTS-2100.
Акрамя гэтага, дзякуючы нізкай частаце сігнал значна менш затухае з-за асаблівасцей ландшафту і нашмат лепш пранікае ў закрытыя памяшканні. Такім чынам, абсталяванне стандарту UMTS-900 падыходзіць для пакрыцця якасным 3G не толькі сельскай мясцовасці, але і гарадоў са шчыльнай і высокай забудовай.
МТС і Velcom атрымалі дазвол на выкарыстанне стандарту UMTS-900 ад Дзяржаўнай камісіі па радыёчастотах у снежні мінулага года.
Міжнародная спецыялізаваная выстаўка "ЦІБО-2016" праходзіць у Мінску з 19 па 22 красавіка. У ёй прымаюць удзел больш за 100 кампаній з 18 краін (Беларусь, Расія, Украіна, Казахстан, Азербайджан, Літва, Латвія, Польшча, Чэхія, Германія, Фінляндыя, Швецыя, Вялікабрытанія, Турцыя, Кітай, Рэспубліка Карэя, Японія, ЗША). Праходзіць яна падчас міжнароднага спецыялізаванага форуму па тэлекамунікацыях, інфармацыйных і банкаўскіх тэхналогіях "ЦІБО-2016".